Tripura aṭanga malaria umbo tum

Tripura chuan kum 2027-ah an state chu malaria awm lohna state-ah siam hman a tum tih health secretary Kiran Gitte chuan Ningani khan a sawi.

Kiran Gitte kaihhruai hian June 2-4 chhung khan National Health Mission (NHM) headquarters-ah state-level review meeting neih a ni a, malaria leh dengue natna umbo dan tur chungchang sawi ho a ni.

Review meeting-ah hian malaria officer, state consultant leh malaria technical supervisor-te bakah account assistant-te leh data entry operator-te an tel. NHM mi pawimawh zingah Joint Mission director Arup Dev leh member secretary Dr. Nupur Debbarma te an tel bawk.

Gitte chuan state sorkarin 2027-ah an state aṭanga malaria umbo a, Tripura chu malaria awm lohna hmuna siam an tum thu sawiin, thosilen nuai 9.5 an semchhuah tawh thu a tarlang. Hei bakah hian thosi kahna, thosi ei ṭhin sangha chi khat larvivorous fish tlangzarh leh mihring chenna in tina malaria test kalpui bakah, enkawlna pek chungchanga hma lak a nih thu a sawi bawk.

Meeting-ah hian malaria enkawlna tur damdawi prophylaxis sem, health camp buatsaih leh hmun tlawhpawh loh Jumia-a chengte tana hmalak an tum. Official-te chuan state sorkarin ruahmanna felfai tak siamin, malaria tihrem leh dengue umbo an tum thu an sawi a ni. An ruahman zingah hian awareness campaign neih, thosi pianna hmun tih chhiat, a hma lama natna hriatchhuah bakah a hun taka enkawlna dawnte a tel.