Assam : CM-in relief camp tlawh

Assam chief minister Himanta Biswa Sarma chuan Zirtawpni khan tuilian avanga harsatna tawkte awm lailawkna, Hailakandi-a relief camp a tlawh. CM hi medical team-in an zui a, camp-a awm mekte zingah damlo enkawl ngai an awm leh awm lohte an enfiah a ni.

Chief Minister Sarma chuan Kalinagar leh Panchgram relief camp-a awmte pawh a tlawh a, an dinhmun hriatchan a duh thu sawiin Hailakandi-a tuilian vanga chhiatna tawkte tan an awm reng tur thu a sawi.

Hetih mek lai Assam-a Morigaon district-a tuilian chuan ziaawm lam a pan tawh a, mahse khaw 117 te chu tuilian vang hian buaina an la tawk. Assam State Disaster Management Authority (ASDMA) tarlan danin, tuilian hian state chhung district 19-a mi nuai 5.50 te harsatna a la thlen a ni.

State pum huap chuan tuilian dinhmun hian zual lam a la pan thung a, Sribhumi district-ah chenna in enge maw zat leh sumdawnna hmunte a tihchhiat tawh avangin nunphung pangngai a ti buai hle. North Sribhumi thingtlang khua Baatgram-a cheng ṭhenkhatte chuan an chenna in tuiin a chim avangin ni li vel khawlaiah an riah tawh thu an sawi bawk.

Brahmaputra lui lian avangin Assam Pobitora Wildlife Sanctuary, samak ki pakhat neite chenna hmun pawh tui hian a chim tawh. Sanctuary enkawltute chuan km16 bial vel chu tuiin a chim avangin ramsa sawnchhuah kawngah harsatna an tawh thu an sawi.