Sikkim: Leimin avangin mi pathum 3 thi

Sikkim-a Lachen district-a Army camp, Chaten-ah June 1 khan ruahsur nasa avangin lei a min a, mi pathum an thi. Chin hriat lohin mi paruk an awm bawk.

He leimin hi zan dar 7 vela thleng a ni a, Indian Army te chuan rang taka chhanchhuah hna thawk nghalin mi pali chu hliam tenau neiin an chhanchhuah thu an sawi.

Chhiatna thlengah hian sipai pathum thite chu Havaldar Lakhwinder Singh, Lance Naik Munish Thakur, leh Porter Abhishek Lakhada te an ni. Sipaite chuan nunna chan chhungte an tuarpui thu an sawi bakah chhawmdawlna an pek zui tur thu an puang bawk.

Chhanchhuah hna kalpui mek la niin, team-te chuan chawl loin chin hriat loh paruk la awmte zawn hna an la chhunzawm zel a ni. Chhiatna thlenna hmun hi hmun chhengchhe tak a ni a, khua in a zir loh vangin chhanchhuah hna thawh pawh harsa an ti hle. Hetih mek lai hian an mi zawnte chu him dam taka an zawn hmuh theihna turin theihtawp an chhuah a ni.

Sikkim-ah hian ruah a sur rei tawh avangin leimin vanga chhiatna eng emaw zat a thleng tawh a, hmun hrang hrangah harsatna an tawk mek bawk. Thuneitute chuan khua leh tui leh khualzinte himna turin theihtawp an chhuah a, khualzin hmun hrang hrang a la tangkhangte chu hmun him zawka thiarchhuah hna an thawk mek bawk a ni. North Sikkim-a Lachung-a khualzin tangkhangte pawh Pathianni khan lirthei 18 hmangin him takin Phidang, Lower Dzongu hruai thlen an ni tawh.