Manipur: COCOMI-in flood relief helpline siam

Manipur-a Coordinating Committee on Manipur Integrity (COCOMI) chuan state chhunga ruahsur nasat avanga tuilian leh chhiatna dang thleng vanga harsatna tawk mipuiten chhawmdawlna leh ṭanpuina a hun taka an dawn ṭhin loh avangin sorkar chu na takin an dem thu an sawi. Hemi rual hian harsatna tawk mipuite hnena a rang thei ang bera chhawmdawlna pek an nih theihna turin flood relief helpline an siam.

Convenor kaihhruainain COCOMI team chuan June 1 khan field survey an nei a, harsatna tawk enge emaw zat an hmuh chhuah bakah ṭanpuina an dawn vat theihna turin he hmalakna hi an kalpui ta a ni. COCOMI chuan harsatna tawkte ṭanpui tur hian Flood Relief & Emergency Helpline chu Khurai Lamlong Keithei-ah an buatsaih.

COCOMI chuan State Disaster Response Task Force din rawtin, mithiam zawkte nen chhanchhuah hna chak zawka thawh tumin hma an la mek tih an sawi. District tinah leh sub-division-ah tuilian thlen hlauhawm zualna hmunah invenna leh drainage infrastructure tih changtlunna tura hma lak an rawt bawk.

Digital relief tracking system hman a ṭul thu thu sawiin, COCOMI chuan fur lo thlen hmaa lo inrinlawk dan te, khawtlang inzirtirna program huaihawt an tum bawk a ni. Chhiatna lo thlen thulha chhawmdawlna chak zawka kalpui leh, civil society pawlte nena thawh hona ṭha nen ruahmanna mumal tak neih an duh thu an sawi.