Hmarchhak bialah ruah sur nasain chhiatna nasa tak thlen

Hmarchhak biala state hrang hrangah ruah sur nasa avangin chhiatna nasa tak a thleng mi tam takin harasatna an tawk mek bawk. Zin veivahna leh rel service thlengin a khaihlak a ni.

Assam:

Assam-ah ruahsur nasain leimin leh tuilian a thlenah May 29 zan thleng khan mi pariat an thi tawh a, district 15 aia tamah mi 78,000 chuangin harsatna an tawk mek.

Central Water Commission (CWC) chuan state chhunga lui lian 10 zingah Brahmaputra leh Barak pawh telin tuilian nasa tak thlen mai hlauhawmin a awm avangin 'orange bulletin' a ti chhuak.

Northeast Frontier Railway chuan Baraigram-Dullabcherra section rel kawnga tui a len nasat avangin Dullabcherra-Silchar inkara khualzin phur rel service chu cancel a nih thu sawiin, Dullacherra-Guwahati Express chu Dullabcherra aṭang ni loin Baraigram aṭanga a tlan tur thu a sawi. Kamrup district-a Chaygaon huamchhung Shingra Shalnibari-a National Highway-17 pawh Inrinni khan tuiin a chim tih an sawi bawk.

Guwahati khawpui chhungah pawh tui a tling nasa hle a, hmun eng emaw zatah tui leh power supply thlengin a khaihlak a ni. Urban affairs minsiter Jayanta Malla Baruah chuan khawpui chhungah harsatna thlenna hmunte chu official-te nen an enfiah a ni.

Chief minister Himanta Biswa Sarma chuan nimin khan union home minister Amit Shah nena inbiain, an state dinhmunte a rawn zawtfiah a, harsatna an tawh mekah a theih anga puih an inhuam reng thu a rawn hrilh tih a sawi.

Meghalaya :

Meghalaya-ah tun hnaia ruahsurin chhiatna a thlenah mi paruk an thi tawh niin oficial-te chuan an sawi.

Official-te chuan West Garo Hills district-ah ṭekin a den vangin mi pahnih an thi a, Ri-Bhoi ah tuilianah mi pakhat a tla tlum bawk tih an sawi. Hemi hma hian ruahsur vanga chhiatna thlengah mi pathum an lo thi tawh bawk. Chief minister Conrad K Sangma chuan mitthi chhungte hnenah zangnadawmna Rs nuai 4 ṭheuh pek an nih tur thu a puang.

Ruahsur vangin khaw 49-ten leimin leh tuilian an tawrh mek bakah, power supply pawh a khaihlak bawk. District disaster managment authority chuan thil awmdan ngun takin an thlithlai reng thu sawiin, CM Sangma chuan department hrang hrangte chu chhiatna nasa zawk thleng tur venna kawngah theihtawp chhuah tur leh, mipuite pawh fimkhur turin a chah.

Nagaland :

Nagaland-a Dimapur khawpui chhung hmun tam tak chu ruahsur nasa vangin tuiin a chim nasa hle a, Chungaizaeng Colony chu a tuar nasa ber niin chenna in eng emaw zat chu tuiin a chim a ni.

Nagaland State Disaster Management Authority (NSDMA) chuan June 5 theng an state-ah ruah nasa takin la sur chhunzawm dawn nia sawi a ni avangin mipui te chu fimkhur turin a chah. Ruahsur bakah thli leh ṭek te pawh a tel dawn nia sawi a ni bawk.

NSDMA chuan District Disaster Management Authorities (DDMAs) tin leh deparmtent hrang hrangte pawh fur thleng chho mekah mipuite himna tur ngaihtuaha inralring reng turin a chah.

Sikkim:

North Sikkim-a hmun hran hranah ruahsurin leimin a thlen vangin Inrinni khan khualzin 1,500 vel an tangkhang mek tih official-ten an sawi. Teeta luia tla nia hriat, khualzin pariatte zawn hna pawh ruahsur vangin thawh zawm theih a ni rih lo tih official-ten an sawi.

Ningani zan khan khualzin 11 chu Mangan district-a Teesta luiah an tla a, pakhat a thi a, mi pahnih chu chhanchhuah a ni. Hetihlai hian mi dang pariatte erawh an chin hriat an la ni lo.

Manipur:

Manipur-ah ruahsur nasa tak avanga tuilian leh leiminah state chhung hmun hrang hrangah chenna in 883 vel a tichhe tawh a, mi 3,802 velin harsatna an tawk mek tih Pathianni khan official te chuan an sawi.

State khawpui Imphal hmun hrang hrang leh Imphal East district-te chu tuiin a chim nasa tawh hle a; Khurai, Heingang leh Checkon pawhin tuilian hi an tuar bawk a ni. Manipur governor Ajaay Kumar Bhalla chuan Imphal huamchhunga chhiatna thlenna hmun engemaw zat a tlawh tawh a, Imphal East-a tuilian tuar mi 800 vel chu sipai leh Assam Rifles ten an chhan chhuak tawh a ni.

Tun hnaia ruahsur nasa vangin state chhunga hian hmun 12-ah leimin nasa tak a thleng tawh. Nimin khan Imphal East district-a Iril lui chuan hlauhawm chhinchhiahna a pel tawh bawk. Lui kuang thawm ṭhat hna hi thawh mek a ni. Hetih lai hian Checkon leh Wangkhei luia tui awm chu tlemin a kam deuh a, mahse Khurai leh Heingang constituency-te dinhmun erawh a la him lo hle tih an sawi. Heng hmun hi Inrinni khan tui hian a chim tawh a ni.

Tripura:

Tripura hmun hrang hranga ruahsur nasat avangin an chenna luah tlak loha a chhiat avangin chhungkaw 1,623 ami, mi 7,019 chu relief camp hrang hrangah sawn a ni tih nimin khan chief minister Dr Manik Saha chuan a sawi.

State khawpui Agartala khaw chhungah tui a tling nasa hle a; tui paih hna hi thawh mek a ni. Harsatna thlenna hmun hrang hrangah chhanchhuah leh chhawmdawl hna thawk turin NDRF leh SDRF team bakah civil volunteer leh agency hrang hrang tirh an nih thu CM chuan a sawi. Mipuite chu sorkarin kaihhruaina a siamte zawm ṭha a, hmun him lamah insaseng turin a ngen bawk.