Nagaland : Reservation policy duh lohna lantir

Nagaland-a hnam lian panga - Angami, Ao, Lotha, Rengma leh Sema intelkhawmin an din, 5 Tribes Committee on Review of Reservation Policy huaihawtin heng hnam awm tamna districts hrang hrang headquarters-ah reservation policy duh lohna lantirin kawng zawh huaihawt a ni.

Hnam panga aiawhte hian state sorkar hnenah reservation policy ennawn tura ngenin April 26, 2025 khan memorandum pawh an lo theh lut tawh a ni. An thil phut ngaihtuah tur hian sorkar chu ni 30 hun an pe a, mahse an hun tiam chhunga sorkarin a ngaihtuah zui loh avangin kawng an zawh ta a ni. Nawrh hi huaihawt chhunzawm zel an la tum tih pawh an sawi.

Committee chuan Nagaland sorkar chuan kum 1977 aṭang khan 'Backward Tribes' (BT) tia a sawite tana job reservation quota a siam chu ennawn a la ni lo tih sawiin, hnam hrang hrangte chuan sorkar hna laknaah intluktlang vek tura an duh thu tarlangin, he policy hian hnam pangate dinhmun a ti chhia niin an tarlang.