Meghalaya : Govt. Engineering College hmasa berin AICTE phalna hmu

Meghalaya-a government engineering college hmasa ber, Shillong Goverment College of Engineering chuan All India Council for Technical Education (AICTE) aṭamngin Civil Engineering leh Electrical Engineering course kalpui phalna a hmu.

April 30. 2025 khan AICTE chuan Principal Secretary of Education, Government of Meghalaya hnenah Letter of Approval (LoA) a pe chhuak a ni. Institution hi East Khasi Hills district, Mawlai Kynton Massar-ah din niin North Eastern Hill University (NEHU), Shillong hnuaiah a awm. Kum 2023, January 16 khan Rashtriya Uchchatar Shiksha Abhiyan (RUSA) hnuaia state sorkar hnuaia engineering hmasa ber hi CM Sangma chuan a lo hawng tawh a ni.

College-ah undergraduate program pahnih, Civil Engineering leh Electrical Engineering course-ah hian 2025 - 26 academic session atan zirlai 30 lut thei tura ruahman a ni. State sorkar policy angin college hian Economically Weaker Sections (EWS) aṭanga candidate-te tan seat 10% a dah dawn a ni.

AICTE thil phut tihhlawhtlin nan state sorkar chuan zirna in hian infrastructure, qualified faculty, leh academic inkaihhruaina standard a zawm ngei ngei tur a ni. State sorkar chuan college-in heng tehfungte a tlin theih nan sum tlingkhawm ruahman a tum bawk. AICTE dan angin zirna in hian NEHU aṭangin affiliation emaw phalna emaw a la tur a ni a, university-in admission tih hun tur a ruat chu a zawm tur tih a ni bawk.