Meghalaya : CUET-UG test centre atan ICFAI University Tura thlang

Meghalaya-a ICFAI University, Tura chu National Testing Agency (NTA) chuan Undergraduate programme hrang hranga Common University Entrance Test (CUET) neihna tur test centre atan official-in a ruat.

Exam hi May 13 leh June 3, 2025 inkarah Computer-Based Test (CBT) format-a neih tur a ni.

CUET-UG test centre a awm dawn tak avangin Garo Hills biala zirlaite tan hmun hla tak tak zin ngai loin national-level entrance awlsam zawkin an nei thei dawn ta a ni. ICFAI Tura hi a hmain NTA nen hian thawh hona nghet tak lo nei tawhin, kum 2022 khan CUET-PG exam hlawhtling takin an lo buatsaih tawh a, March 2025 khan an buatsaih leh bawk.

CUET Deputy Manager (Administration) leh Liaisoning officer Buddhadev Prasad chuan, "Tura-a CUET neih hian zirlai entrance exam hmachhawn turin hmun hla tak tak an kal a ngai tawh dawn loa, helai biala zirna lama hmasawnna ropui tak a ni," tiin a sawi.