China-in Arunachal-a hmun hming thlak a tumna India-in hnawl

India chuan nimin May 14 khan China-in Arunachal Pradesh-a hmun ṭhenkhat hming thlak a tum chu hnawlin, hetiang thil atthlak tih tumna hi pawm a ni dawn lo tih a sawi.

China chuan Arunachal Pradesh hian an ram chin, Tibet chhim lam bial niin a sawi a ni. Hming thlak a tumna hi chhangin External Affairs Ministry thupuangtu, Randhir Jaiswal chuan, "China hian India rama Arunachal Pradesh state hmun hming vuah tumna awmze nei loin a la kalpui chhunzawm zel a ni," tiin hetiang thil a tih tum hnawl a nih thu a sawi nghal bawk.

Jaiswal chuan media-te zawhna chhangin, "Hetianga hming thlak danglamna hian Arunachal Pradesh dinhmun a ti danglam dawn chuang lo a, India ram chhung a ni reng dawn a ni," a ti.

Nikum April thla khan Beijing chuan Arunachal Pradesh-a hmun 30 hming thlakna list a lo ti chhuak tawh a, hei hi India chuan na takin a sawisel nghal bawk a ni.

China Civil Affairs Ministry chuan kum 2017 khan a hmasa ber atan Zangnan-a hmun paruk hming thlakna list a ti chhuak a, kum 2021-ah hmun 15 hming thlakna ti chhuak lehin, kum 2023-ah hmun 11 hming thlakna list a ti chhuak leh bawk.