Tripura: India-in firfiak a bei chhunzawm zel dawn - CM

Tripura chief minister Manik Saha chuan nimin khan India leh Pakistan inkarah inkahhai puang mah se, India-in firfiak dona a chhunzawm dawn tih a sawi.

CM Saha chuan inkahhai puan a nih hnuah Pakistan chuan beihpui thlak mah se, an inhnukdawk leh tawh tih a sawi. "Hmun tinah indona chu thil awmdan azirin a thleng a, thutlukna kan siam a ngai a ni. Inkahhai puan ni tawh mah se, firfiakte dona a la awm reng dawn niin ka hria. Inkahhai hnuah pawh Pakistan chuan beihpui thlakna an nei tawh a, mahse an inhnukdawk tawh a ni. Eng nge thleng dawn kan en ang," tiin a sawi. Hemi hma hian sorkar laipui thupek angin state sorkarin hna a thawh thu a sawi bawk.

CM Saha chuan Zirtawpni khan security agency-te nen meeting an neih thu a sawi a, security mi leh sate chu inremna siam tura hriattirin, international ramriah pawh venhimna khauh zawk kalpui tura a hriattir tawh thu a sawi. Prime minister Narendra Modi, defence minister Rajnath Singh, leh external affairs minister S Jaishankar-te chuan tih tur leh tih loh tur an hriattir tawh a, sorkar laipui thupek anga hmalak a nih thu a sawi bawk a ni.