Nagaland: Zirlaiten lungawi lohna lantir

Nagaland zirlai pawl chuan May 10 khan Phek district-a Kikruma huamchhung kawngpui pawimawh siam hna tih khawtlai a nih avangin lungawi lohna lantirin kawng an zawh.

Chakhesang Students Union (CSU) hminga nawrh huaihawtte hian km 29-a thui kawngpui project - Kohima-Jessami National Highway-a contractor-in a thawhpui National Highways and Infrastructure Development Corporation Limited (NHIDCL) chu an duh loh thu an tlangaupui.

Kohima leh Jessami inkar kawngpui hi Kikruma, Phek, Meluri leh Kiphire district-a chengte tan chuan kawng pawimawh tak niin, tualchhung miten hun rei tak chhung chu leimin, inkharkhip, leh kawngpui chhe lutuk vangin harsatna an tawk tawh a ni.

CSU president Pfhulo Sara chuan January 5, 2024 aṭanga hna thawh ṭan ni mah se, hmasawnna a awm loh avangin mipui an lungawi loh thu a sawi. May 2-a ni sarih chhung ultimatum tih chhuah a nih hnu pawhin hmasawnna a awm lo tih a sawi. Fur a hnaih tawh avangin kawngpui dinhmun chhe zel hi zin mite tan a hlauhawm thu Sara chuan sawiin, kawng khuar siamṭhat, tui luanna mumal tak siam leh leimin thei tur tih ziaawm a ngai a ni, a ti.

CSU hian a hmain Pfutsero-a NHIDCL office chu October 2024 khan an lo khar tawh bawk. Sara chuan kawngpui siam hna thawh muang lutuk sawilangin kum kalta April 20-a report-in a tarlanah hmasawnna chu 10.69% chauh a nih thu a sawi. Contractor-in project thawh zawh hun tura hun tiam, January 2026-ah a zawh fel hman a rin loh thu sawiin, khawl leh hnathawh lama chak tak dah phutin, CSU chuan rang taka hmalak a nih loh chuan nawrh huaihawt an chhunzawm zel tur thu a sawi bawk a ni.