Manipur: Governor-in party hrang hrang meeting kaihruai

Manipur governor, Ajay Kumar Bhalla chuan May 10 khan Raj Bhavan Conference Hall-ah political party hrang hrang hruaitute pualin high-level solidarity meeting a ko a, Pakistan nena ramria buaina chhuak karah Indian Armed Force-te chu state-in a thlawp tlat thu a sawi.

Manipur-a political party hrang hrang hruaitute meeting-ah hian lungrual takin ram pum huapa inpumkhatna leh frontline-a sipaite awmte an thlawp thu an sawi. Meeting-ah hian Aam Aadmi Party (AAP), Bharatiya Janata Party (BJP), Bahujan Samaj Party (BSP), Communist Party of India (CPI), Communist Party of India (Marxist), Indian National Congress (INC), Janata Dal (United), National People’s Party (NPP), Naga People’s Front (NPF), leh Republican Party of India - Athawale te an tel.

Governor Bhalla chuan ramchhung buaina karah politics lama inpumkhatna neih a pawimawh thu sawiin, "Kan sipai huaisente thlawpna lantira kan hruaitute an inlungrual hi a lawmawm hle a ni," tiin a tel zawng zawngte thawhhona chu a fak hle.

Meeting-ah hian Manipur police director general Rajiv Singh, Governor Sumant Singh-a secretary leh major general S.S. Kartikeya, General Officer Commanding 57 Mountain Division bakah officer senior dangte pawh an tel bawk.

Major General Kartikeya chuan ramri dinhmun inthlak danglam chungchang sawiin, inbeihna kal zel kara India-in a chhanlet dan leh inralrinna a neih dan a sawi a, ramri venhimna lama tunlai dinhmun thlirletna chipchiar takin a nei bawk a ni.

Meeting-a tel political party hruaitute chuan prime minister Narendra Modi kaihhruaina leh hmathlir te chu an fak a, ramri buaina awmte chu beiseina nen sorkarin a enkawl danah rinna an nghat tih an sawi.