Meghalaya: Sakhaw hruaituten 'Operation Sindoor' thlawp

Meghalaya-a sakhaw hruaitute chu May 10 khan Raj Bhavan-a governor C H Vijayashankar-a'n special meeting a kohah inhmukhawmin, tun hnaia firfiakte pawikhawihna vanga sipaite hmalaknate chu an thlawp thu an sawi.

Meeting-ah hian Hindu, Kristian, Muslim leh tualchhung sakhaw pawl hruaitute an tel a, khawtlang hruaitute pawh tel bawkin firfiakte dona kawnga an inpumkhatna lantir a ni.

Governor Vijayashankar chuan hetiang hun harsa takah hian khawtlang inpumkhatna a pawimawh thu leh, firfiakte a dem thu a sawi. Chief minister Conrad K. Sangma leh a deputy-te chu Delhi aṭangin virtual-in an tel. State sorkarin he meeting hi a ngaih pawimawhzia sawiin, education minister Rakkam A Sangma chuan, "Hnam hi India mi zawng zawng ta a ni a, mipuite thlawpnain sorkarin a tum a thleng ang," tiin he huna kalkhawmte chu sipaite tana ṭawngṭai turin a chah. Power minister A. T. Mondal pawhin firfiakte'n ram chhungah hmun an chang lo, tiin a sawi bawk.

He huna telte hian Pahalgam beihnaa nunna chante hriatrengna hun an hmang a, pungkhawmte chuan lungrual takin firfiakte pawikhawihna laka tun hnaia sipaite hmalakna an thlawp thu an sawi.