Chakma-te'n 'Citizenship Rights' pek phût

All India “Chakma” Social Forum palaite chuan Thawhṭanni khan Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy and Space Dr Jitendra Singh chu hmuin, 'citizenship rights' pe turin an ngen.

Chakma-te chuan kum 1964-68 inkarah Chakma 15,000 zet chuan Pakistan chu Chittagong Hill tract aṭanga chhuahsanin, India an lut tih an sawi a, Arunachal Pradesh-ah an inbengbel zui ta niin an sawi. Kum eng emaw zat India-ah an khawsak hnu leh an inbenbel hnu pawhin India khua leh tui nihna pek an la nih loh thu sawiin, hma lakpui turin minister an ngen.

September 17, 2016 khan Supreme Court chuan India sorkar leh Arunachal Pradesh sorkar chu Chakma-te India khua leh tui an nih theih nana hma la turin a hriattir. Hmalakna mumal a awm loh avangin tun thlengin Arunachal-a Chakma te chu 'citizenship rights' pek an la ni lo. Hei vang hian Chakma te chuan harsatna tawkin, an khua chhuahsana hmun dang kal turin harsatna an tawk tih an sawi.

Chakma te chuan Dr Jitendra Singh hnenah memorundum thehlutin, Chakma-te buaipui turin Union Ministry of Home Affairs (MHA) hnuaiah special officer pahnih dah an phût thu an sawi. Dr Jitendra Singh chuan Chakma-te chu hma lakpui lo tiamin, an harsatna tawh te chu MHA-ah thlen a tum a lo hrilh a ni. All India “Chakma” Social Forum aiawh hian Arunachal Pradesh
aṭangin Shri Santosh Chakma leh Shri Tejang Chakma-te an an tel a, Mizoram aṭangin Shri Paritosh Chakma, Shri Victor Talukdar Chakma leh Shri Dhana Kumar Chakma-te chuan an telpui bawk.