Manipur University-a Tribal zirlaite nuar chhunzawm zel

Manipur University (MU)-a tribal zirlaiten seat tam zawk hauhsak an phutna kal zelah nawrh an la huaihawt chhun-zawm zel. Tribal zirlaite chuan Academic Council meeting-in Central Educational Institutions (Reservation in Admission) Act, 2006 hmang tura thutlukna a siam chu an dem thu an sawi.

Manipur University-ah hian tribal zirlaite tan seat 7.5% chauh hauhsak nia tarlan a ni. Manipur University Tribal Student’s Union (MUTSU)-te chuan Central Educational Institutions (Reservation in Admission) Act, 2012 chu hman ve ngei an phut tih sawiin, he dan hnuaiah hian tribal zirlaite tan seat 31% hauhsak an nih thu an sawi. MUTSU chuan tun hnaia University Academic Council meeting-in Central Educational Institutions (Reservation in Admission) Act, 2006 hmang tura thutlukna a siam chu an dem tih sawiin, Central Educational Institutions (Reservation in Admission) Act, 2012 hman an duh thu uar takin an sawi. Tribal zirlai lungawilote hi Khuman Lampak Youth Hostel kawtah an pungkhawm a, Parliament Act hman an duh thu te, tribalte dikna rahbeh chu dankalh a nih thu te an au chhuahpui a ni.

Tribal zirlai lungawilote hian tun hnai khan Manipur University Campus chhungah buaina chawk chhuakin, building ṭhenkhat an hal. He thil thleng avang hian University Vice chancellor in-charge pawh a lo ban phah tawh a ni.