Manipur MLA-te bang turin phût

Manipur-a hill district huam chhunga Cong-ress MLA te chu an bial mipuiten nakkuma Manipur Legislative Assembly election-a an chuhve leh duh a nih chuan MLA an nihna aṭanga bang tur leh, Congress party chhuahsan a, party dang zawm turin an ngen.

Hill district mipuiten an MLA te bang tura an nawr chhanah hian, Manipur Legislative Assembly-in “anti-tribal bills” a pass an duh loh vang nia tarlan a ni. Nikum khan Manipur Legislative Assembly chuan “anti-tribal bills” pathum - Protection of Manipur People Bill, 2015; Manipur LAND Revenue and Land Reforms (Seventh Amend-ment) Bill, 2015 leh Manipur Shops and Establishment Bill (Second Amendment) Bill 2015 -te chu a lo pass tawh a ni. Hei hi tribal-te chuan nasa takin an dodal a, mi pakuain nunna an chan phah bawk. Outer Manipur Tribals’ Forum (OMTF) leh Joint Action Committee against Anti Tribal Bills (JAC-AATB) te chuan tribal MLA leh MP-te chu bang tura an duh thu sawiin, tribal-te chenna hmun reng rengah Congress party an duh lo tih an sawi.

Senapati district-a Tadubi assembly consti-tuency aṭanga thlan tlin Congresss MLA Francis Ngajokpa chuan, "Ka bial mipuite chuan MLA ka nihna aṭanga bang tur leh, Congress party chhuahsan turin min ngen a ni" tiin, thutlukna erawh a la siam loh thu a sawi.