Xiabuqu lui Khuahin India a nghawng lo: China

Brahmaputra lui fintu Tibet-a Xiabuqu lui chu khuah ni mah se, hei hian India tan nghawng a nei dawn lo niin Chinese Foreign Ministry chuan a sawi.

China chuan Lalho dam project a kalpui mekah, Tibet ram chhunga Brahmaputra lui fintu Xiabuqu lui chu a khuap a, hei hian sawi zui a hlawh nghal hle. Mi tam tak chuan China chet dan hi an dem thu an sawi a, India chu a ṭhenawm ram chetdan chingfel thuai tura an phut thu an sawi. Hetih lai hian Chinese Foreign Ministry chuan Xiabuqu lui chu khuah ni mah se India tan harsatna a thlen loh tur thu hi a sawi a, buaina tur a awm lo niin a tarlang. "Brahmaputra chuan fintu lui tam tak a nei a, Xiabuqu lui khuah hian nghawng ṭha lo a nei lo ang" a ti. Brahmaputra lui hi Tibet aṭangin India hmarchhak state Arunachal Pradesh-ah a luang lut a, Assam paltlangin Bangladseh ramah a luang lut leh a ni.

October 1 khan China chuan Tibet ram chhungah Xiabuqu lui chu Lalho project atan khuah a nih thu a puang a, he project atan hian USD 740 million ruahman a nih thu a sawi. Chinese foreign ministry chuan India leh Chian inkarah harsatna a awm loh thu tarlang zuiin, boruak muanawm tak hnuaiah ram pahnihte chu an thawkdun a ni, a ti. Brahmaputra lui fintu khuah hian hmarchhak state a bikin Assam tan nggawng ṭha lo a thlen a hlauhthawnawm nia sawi a ni. Hei hi hriain Assam sorkar chuan sorkar laipui chu he thil chingfel thuai tur hian a nawr tawh bawk.