Sikkim CM-in sorkar laipui hma lak pui turin ngen

Sikkim Chief Minister Pawan Chamling chuan New Delhi-a Sikkim house-ah thuthar thehdarhtute kawmin, Sikkim chu India rama state te ber ni mah se, state ralmuang ber leh fai ber, hmasawnna ṭhan chakna state a nih thu a sawi.

Chamling chuan sorkar laipui chu an state-in leilung hausakna a neihte haichhuah leh chhawr ṭangkai kawngah hma lak pui turin a ngen. Sikkim CM chuan Indian economy siamṭhat kawngah an state chuan tih ve theih tam tak a nei tih sawiin, tourism sector leh organic farming lamah an san thu a sawi. Ram pawn aṭanga khualzin tam zawk hip lut turin an hmun hma ten a zir thu sawiin, sorkar laipui chu state sorkar hmalakna te thlawp tur leh, harsatna an neihte chinfelpui a, hma lak pui ṭhin turin a ngen tih a sawi a ni.

CM chuan sorkar laipui policy ṭhenkhat sawi langin, India ram state khawpui te rel kawnga thlunzawm vek tura hmalakna chu a duh khawp loh thu sawiin, Sikkim chu sorkar laipuiin a hlamchhiah niin a sawi. Inkalpawhna ṭha chu an hmasawn zelna atana an mamawh hmasa a nih thu sawiin, an harsatna tawh mek a nih thu a sawi lang bawk. Sikkim-ah hian plastic lam thil reng reng hman khap a ni a, a hmang luite hremna dan khauh tak siam a ni. Chamling hi tun hnai khan World Sustainable Development Summit-ah environment venhim kawnga a hnathawh ṭhat vang te, vision a neih ṭhat vangtein ‘Sustainable Development Leadership Award’ hlan a lo ni tawh.