Tripura-in ram ngaw venhimna atan forest intelligence wing din dawn

Tripura sorkar chuan an state ram ngaw chereu tur venna atan leh, thing tawlh ruk awm ṭhin veng turin Forest Department protection unit thuam chakna atan intelligence wing a din dawn tih a puang.

Forest minister Animesh Debbarma chuan West Tripura-a thuthar thehdarhtute a kawmnaah, an department chuan intelligence wing-ah hian police mi leh sate an chhawr bawk dawn a, a hnuah staff tur hi an la dawn tih a sawi.

Chief minister Manik Saha hnenah an state ram ngaw venhim hna thawhna kawngah senior forest official-te hnuaia thawk tura Tripura State Rifles sipai dah tura a ngen thu a sawi bawk.

Minister Debbarma chuan kum 2022 January aṭang khan thingkung 11,460 kih a nih thu sawiin,hengte hi national highway zauhna tur a ni a, National Green Tribunal (NGT) aṭangin phalna hmuh a nih thu a sawi. Hetih lai hian tawlh ruk tura phalna nei loa thing kih a nih fo avangin an ram ngaw te chu venhim an ngai tawh hle tih a tarlang.

Debbarma hian Hatipara-a Tripura State Forest Academy-ah forest range official-te hman tur motorcyle 58 a hlan nghal bawk a ni.