Sikkim : CM-in Sub-Divisional Administrative Centre hawng

Sikkim chief minister, Prem Singh Tamang chuan April 27 khan Rinchenpong Constituency hnuaia Soreng, Mangalbaria-ah Sub-Divisional Administrative Centre a hawng.

Hawnna inkhawmah hian CM Tamang chuan centre thar a awm chu lawmawm a tih thu leh chhuanawm a tih thu a sawi a, "Mangalbaria-a Sub-Divisional Administrative Centre hawn hi thil ropui tak leh lawmawm tak a ni," a ti. Hemi bakah hian mipuite nen rorelna kawnga inpawh zawkna kawngah Centre hian hmun pawimawh tak a chang dawn tih a sawi bawk. He Centre hian helai biala mipuite tan service ṭha zawk, hna chak zawk, leh rorelna awlsam zawk a siamsak dawn a ni, a ti.

CM Tamang chuan Sikkim state kil tinah hmasawnna a thlen theih nan sorkarin hma a la chhunzawm zel tih sawiin, centre thar hi sorkarin mi zawng zawng huapzo hmasawnna leh rorelna ṭha a neih theihna tura a inpekna chhinchhiahna a nih thu a sawi. Hetianga hma lakna hian sorkar leh mipui nawlpui inkara inmihranna awmte tih ziaawmna kawngah a pui dawn tih a sawi bawk.

Chief minister chuan centre thara thawk tur official zawng zawngte chungah duhsakna a hlan a, mipuite chu thinlung zawng zawngin a lawmpui thu a sawi. Helai hmuna official post-te hian mipuite tan rawngbawlna ṭha zawk siam turin inpekna leh thinlung taka hna an thawh theih a beisei thu a sawi bawk a ni.