Assam: NFR-in Guwahati station-ah AI camera 135 dah

Guwahati rel station-ah security tih changtlun niin AI-powered CCTV camera 135 leh panic button 20 dah a ni. Hei hi passenger-te himna leh a enkawlna lam tih changtlunna tur a ni.

CCTV camera hi facial recognition leh intrusion detection hmanga thuam a ni a, system hi misual hriatchhuah theihna tur leh camera tihbuai a nih chuan thuneitute hnena hriattirna pe thei tura siam a ni. AI system hi Railway Protection Force (RPF) control room-ah 24/7 monitoring hmanga thuam a ni. Hmun pawimawh 20-ah panic button dah hian harsatna tawk passenger-te chu thuneitute hnenah rang takin hriattirna a thawn thei a, chhanna pawh an pe zung zung thei dawn a ni.

RPF-a thawkte awmna tur, Escort Mobilization Hall thar pawh hawn niin he hall hian helai biala transport lun berah hian emergency atan pawh a thuam chak dawn a ni. NFR hian station dangah tih changtlun hna hi a kalpui mek a, hemi zingah hian Haiborgaon pawh a tel. Panic button leh invenhimna tur dangte pawh a awm dawn a ni. Station dangah pawh dah chhoh zel an tum.

NFR hnuaia station 50-ah surveillance camera 1,000 chuang a awm mek a, tih changtlunna pawh kalpui mek a ni. Station piah lamah NFR chuan level crossing gate 28-ah high-resolution CCTV camera dahin, overbridge leh underpass siamin kum kalta chhung khan crossing 28 a titawp tawh bawk.