Meghalaya : Security force-te NEHU aṭangin inhnukdawk

Meghalaya-a North-Eastern Hill University (NEHU) zirlaiten university campus-ah security force dah chhunzawm zel a nih chuan class boycott an tum thu a sawi hnuah, Thawhṭanni zan khan campus aṭangin security force-te an inhnukdawk.

NEHU-a Hindi professor, Dr Alok Singh kutthlak nia sawi chungchangah NEHU Students Union president Sandy Sohtun man a ni a, hemi hnu hian university campus-ah security force te hi dah luh a ni. Dr Singh hi April 24 khan a office-ah kut thlak nia sawi a ni a, damdawi-inah dah luh a ni.

Zirlaite leh university official-te chuan campus chhunga police leh Central Reserve Police Force (CRPF)dah a ni hi an lungawi lo hle. NEHUSU general secretary Toniho S Kharsati chuan security force-te hi dah chhunzawm zel an nih chuan zirlaiten class boycott in, campus pawh chhuahsan an tum thu a sawi. Sorkar chu zirlaite hmakhua nge a ngaih a, zirtirtu pakhat, a thusawi chungchang finfiahna awm lo a ngaih pawimawh zawk tiin a zawt.

Acting vice-chancellor, Prof Sherwin May Sungoh chuan Director General of Police leh East Khasi Hills Deputy Commissioner te hnenah lehkha thawnin thil awmdan a sawifiah a, security dah an nih avang hian campus chhungah hlauhna rilru natna lian tak a siam tih a sawi.