Manipur: Online property tax platform tlangzarh

Manipur-a municipal council 26-te tana online property tax platform siam chu Ningani khan Imphal-ah tlangzarh a ni. He hmalakna hi Manipur-a rorelna langtlang leh felfai taka kalpuina tura tih a ni.

State chhungah hian urban local body (ULB) 27 a awm a, ULB pakhat chu Municipal Corporation niin, ULB dang 26 chu municipal council an ni. Manipur Municipalities Act, 1994 thupek angin municipality zawng zawngin kumin financial year 2025-26 aṭangin property tax khawn hi kalpui tura beisei an ni.

Platform tlangzarhnaah hian state chief secretary, Prashant Kumar Singh chuan Manipur Municipality Property Tax Board (MMPTB) team-te chu an thawhrimna avangin a fak a, tluang taka hman a nih theih nan training mumal tak neih a ṭul thu sawiin, mipuiin an hman ṭangkai theihna turin service tih hmasawn a pawimawh thu a sawi bawk.

Platform-a thil pawimawh dangte chu property registration, official verification leh approval process leh property tax pekna te a ni a, process hrang hrang atana data analytic pawh a awm dawn bawk.

Tlangzarh inkhawmah hian National Urban Digital Mission chief program officer, Manpreet Singh nen live video-a inbiakpawhna neih a ni bawk a, property registration chungchanga inzirtirna pawh tlangzarh inkhawmah hian tihchhuah a ni.

May 2022 khan National Institute of Urban Affairs (NIUA) leh MMPTB inkarah Memorandum of Understanding (MoU) ziah a lo ni tawh a, Manipur hi Ministry of Housing and Urban Affairs hnuaia National Urban Digital Mission (NUDM) hnuaia India rama state inziak lut hmasa ber a ni.