Arunachal: Border Adventure Race hmasa ber nei

Arunachal Pradesh-a Menchuka Valley-ah National Adventure Racing Championship vawi thumna, Apri 17-20 chhunga neihah India rama a vawi khatna atan Border Adventure Race neih a ni. He intihsiaknaa pakhatna team chuan Adventure Racing World Championship 2025 neih turah an tling nghal a ni

Border Adventure Race neihna Menchuka hi Indo-China bula awm a ni a, he intihsiaknaah hian ram chhung bakah ram pawn lam aṭangin an tel. Intihsiakna hrang hrang - mountain biking, trail running, kayaking, rope work bakah terrain harsa tak tak paltlangin an in el a ni. He intihsiakna hian Arunachal Pradesh chu adventure tourism lama hmun pawimawh takah a chantir a ni.

He hunah hian Arunachal Pradesh tourism minister Pasang Dorjee Sona chuan thu sawiin, state-in adventure tourism tih hmasawn a tum thu a tarlang. “Arunachal Pradesh hi khawvel pum huapa adventure lama hmun pawimawh taka lang thei turin dinhmun ṭha takah a ding a ni. National Adventure Racing Championship hmang hian kan state theihna ropui tak pholan kan tum a, nakkumah hei aia lian zawka buatsaih leh pawh kan tum a ni,” tiin a sawi.