
Meghalaya: Sorkarin ramri venhimna ti khauh
Jammu & Kashmir-a Pahalgam-a firfiakte'n civil mite beia, mi 26 thihna a thlen hnuah Meghalaya sorkar chuan Bangladesh ramri-ah venhimna an tih khauh nghal thu a puang.
Tourism minister Paul Lyngdoh chuan thuneitute'n venhimna khauh zawka an kalpui thu a sawi a, Border Security Force (BSF) nen pawh inrem takin thil awmdan an enfiah mek tih a sawi bawk. Chief minister Conrad K. Sangma chuan ramri venhim kawnga hmalakna awm theite chipchiar taka a zirchian thu a sawi bawk.
Lyngdoh chuan police director general, Idashisha Nongrang nen state chhunga venhimna tih changtlun chungchangah inbiakna an neih thu a sawi. Sorkar hmalakna kalpui mek zingah police hna ruak 3,000 vel luah khat turin ruahmanna an siam a, central agency-te nen security lama harsatna awmte tih tawp tumin hma an la mek a ni.
Pahalgam-a inbeihna thleng chu nunrawnthlak a tih thu sawiin, Lyngdoh chuan sorkar laipui nen firfiakte dona kawnga hma laknaah an inlungrual thu a sawi. Meghalaya ramri venhimna leh remna leh muanna awm theihna tura sorkar a inpek thu a sawi.
Hetih mek lai hian Jaintia Hills-a Jaintia National Council (JNC) member-te chuan Bangladesh aṭanga dan loa ramria lut ru nia rinhlelh mi panga an man. Nilaini khan National Highway-6-ah rinhlelh thil thua chhuizuina an neih laiin an lo man a ni.
JNC-in a tarlan danin, an mi mante hian document rintlak an nei loa, tualchhung broker-te puihnain India ram an luh thu an sawi. Heng broker-te hian Rs 1,000 aṭanga Rs 2,000 inkar fee an chawitir nia sawi a ni a, Umpleng Cement area-a hna an hmuh theihna tura puih an tum niin an tarlang. JNC chuan an mi mante hi thuneitute hnenah an hlan. Council chuan he thil hi chhui chian a, mawhphurtute thubuai siamsak turin an ngen bawk.