Assam: 'Shiksha Setu'in PM Excellence in Public Administration award dawng

Assam sorkarin zirna siamṭhatna atana a hmalakna 'Shiksha Setu, Axom' chuan 'Innovation-state' category-ah Prime Minister's Award for Excellence in Public Administration 2024 a dawng. Prime minister Narendra Modi chuan April 21-a Civil Services Day lawmnaah he chawimawina hi a hlan a ni.

Chief minister Himanta Biswa Sarma chuan state team-te a lawmpui thu sawiin, Assam-in zirna siamṭhatna tura a inpekna a pholang a ni, a ti. Shiksha Setu application hi digital platform niin school, zirlai, leh staff te information pekna atan an hmang.

Guwahati Tea Auction Centre (GTAC) chuan kum 2024-25 financial year chhung khan Rs nuai 3,850 man thingpuife hralhin, hetianga hlawhtlinna hi a hmain an la nei ngai lo. Financial year 2023-24 chhung khan GTAC hian thingpuife kg 166.34, Rs vbc 3048 man an hralh a, a vaiin Rs vbc 183.21 a ni. Financial year 2024-25 ah thingpuife Rs nuai 3850 man a hralh a, hei hi kum hmasa aiin Rs vbc 800-in a tam zawk a ni tiin Guwahati Tea Auction Centre Secretary chuan a sawi. "Kum kal ta khan Assam thingpui thar chu kg maktaduai 60-70 velin a tlem a, chuti chung chuan financial year 2024-25 chhung khan thingpuife mtd 3 vel kan hralh belh leh a ni," tiin Bihani chuan a sawi bawk.

Thingpuife man sang chho zel chu state-a thingpui huan tenau zawk neituten an hlawkpui hle a,"GTAC-a thingpuife man tihsan hian green leaves man pawh a sang dawn tihna a ni a, state chhunga thingpuife chingtute pawhin hlawkna an hmu mek a ni," a ti.