Manipur: Earth Day cyclothon neih a ni

Manipur khawpui, Imphal-ah Earth Day 2025 lawmna pualin Thawhlehni khan cyclothon neih a ni a, mi 300 vel an tel. Kilometre 9.5-a thui inelna hi "Our Power, Our Planet" tih thupui hmanga buatsaih a ni a, fossil fuel aiah bicycle hman leh renewable energy chawi larna atana tih a ni.

Forest and Environment principal secretary, Arun Kumar Sinha, IAS, chuan Western Kangla Gate aṭangin inelnaa tel te hi a vai liam. He huna telte hian Porompat Directorate of Environment and Climate Change complex-a an zawh hmain Keishampat, Keishamthong, Pishum Singjamei leh veng dangte paltlangin, "Renewable Energy, the Solution" leh "Keep Earth Green and Clean" tih thu ziakte an pholang.

Dr. Kh. Palin, Shija Hospital leh Research Institute Managing Director chuan "Ramngaw hi boruak ṭha min petu a ni a, thingkung tel lo chuan mihring hi kan dam thei lo. Leilung chhiatna leh siamṭhat kawnga mawhphurtu kan ni" tiin a sawi. Directorate of Environment and Climate Change director Dr T Brajakumar Singh chuan kan chenna khawvel humhim thei awmchhun kan nih thu a sawi ve bawk.

He hun hman hi sorkar hotute leh khawtlang hruaitute pawhin an thlawp ṭha hle. Reserve Bank of India assistant general manager Naveen Katlare chuan boruak inthlak danglam zel chu ngaihven a ṭul thu sawiin, adventurist Joykumar Sharma chuan rally hian environment thuchah mi tam zawk hnena thehdarh kawngah a pui dawn tih a sawi.