Arunachal Pradesh : Governor-in War Memorial hawng

Arunachal Pradesh governor Lt Gen (Retd) K T Parnaik chuan Pathianni khan Longding district-ah War Memorial chu virtual-in a hawng a, hei hi state-a mi huaisen, a duty-na hmuna nunna hlantu Lance Naik Agoi Wangsa hriatrengna atana buatsaih a ni. Governor chuan Indian Army, state leh hnam pumpui chuan Lance Naik Wangsa-a huaisenna leh inpekna chu chibai an buk thu a sawi.

Lance Wangsa-a nupui, Veer nari Koiman Wangsa chu a ngaihsan thu a sawi bawk a, a chakna leh a chhelna chu a fak hle. Lusun chhungte chu state sorkarin a ṭul anga ṭanpuina pe turin a inpeih tih a sawi. He hun hi hun ropui tak leh chhuanawm tak a nih thu sawiin, thlah kal zelte tana fuihna chhinchhiahna a nih thu a sawi. India sipai huaisente chawimawi a, an chhungte kianga ding tlat turin mipui zawng zawng a chah.

Governor chuan district-in sipai chhuanawm tak tak an neih chu a tarlang a, hun rei tak chhung Armed Force-a thawk mipa leh hmeichhia huaisen tak tak chher chhuah an nih thu a sawi. He bial, ex-servicemen-te awmna langsar tak hian khawtlang nunah ram hmangaihna a lantir a ni, a ti.

"War Memorial hi hriatrengna mai ni lo, duty, chawimawina leh inpekna tura kohna a ni," tiin Longding district-a mipuite chu harsatna a thlen lai hnam tan an din tlat avangin a fak bawk a ni.