Assam: Mumbai police-te'n Assam mi bum hmang 5 man

Mumbai police crime branch chuan Ningani khan Assam mi, bum hmang mi panga an man a, credit card scam lian tham Rs vbc 1.26 vela inhnamhnawih niin an sawi.

Official chuan pawikhawihtute hian CIBIL score sang tak nei, mimal identity hmangin bank aṭangin dik lo takin credit card an la niin an sawi. An mi bum leh bank-te'n FIR an thehluh hnuah, Mumbai police crime branch (unit III) chuan kum kal ta aṭang khan chhui chian hna an thawk tih an tarlang.

He thil hi an chhui chian hnu hian an mi puhte hian document lem hmangin credit card 55 an la tih an hmuchhuak a, heng hmang hian Rs vbc 1.26 an la tih an hrechhuak bawk. Mumbai police crime branch (unit III) te hian technical intelligence hmangin sumdawnna dik lo an zawn chhuah thu a sawi a, hei vang hian thil ti sualtute hi Assam-a Morigaon aṭangin man an ni tih an sawi.

Senior inspector Sadanand Yernekar chuan pawikhawihtute hian multi-stage operation thiam takin an hmang a, member pakhat chu online-a credit nghet tak nei mi malte hriatchhuah tir turin an ti a ni. Pawikhawihtute hian target an thlan hnuah information lem hmangin PAN card lem an siam ta a ni. Member dang pakhat, Assam-a Aadhaar card center enkawltu chuan PAN card siam chhuah hmangin a inmil tur Aadhaar card lem a siam chhuak thung, tiin Yernekar chuan a sawi. Identity document dik lo tak takte chu bank-a credit card dilna atan an hmang a, loan an dil bawk a ni. Yernekar chuan he scheme tihfel nan hian gang member dang pakhat chu Mumbai emaw Delhi-ah emaw kalin, document lem-a address pekte hmangin credit card-te thawn chhuah chu an ti tawp tih a sawi bawk.