Meghalaya: MP-in ramri-a bungraw tawlhruk chungchangah sorkar sawisel

Meghalaya-a Tura Congress MP, Saleng A Sangma chuan Ningani khan Meghalaya sorkar chu Bangladesh nena an state ramriah dan loa sumdawnna leh bungraw tawlhruk thunun thei loah a puh. MP Saleng chuan hei hian ruihhlo vanga buaina a tipung chak hle a, a bik takin state chhunga ṭhalai zingah HIV hri kai an pung nasa hle niin a sawi.

Saleng chuan thil awmdan punlun zel chu a ngaimawh thu sawiin, Meghalaya-a ruihhlo hmangtu zat chu nuai 3 chuang zetin an pung tih a sawi. Naupang zingah HIV kai an pung chak lutuk chu ruihhlo sumdawnna tih tawp loh avanga lo awm a nih thu a sawi bawk.

MP chuan ramri kaltlang bungraw tawlhruk, dan loa lungalhthei laihchhuah leh phurh chhuah kawnga harsatna awm chungchangah sorkarin hma a lak loh thu a sawi a, ramri-a harsatna tawk mekte a tlawh dawn tih a sawi. Custom-te leh BSF hotute bakah district commissioner-te nen joint meeting koh a, thil awmdan endik a tum thu a sawi bawk.

MP Saleng chuan Meghalaya leh Bangladesh nena kilometer 443-a thui international ramri chu hun rei tak chhung dan bawhchhiatna hmun a nih thu a sawi a; bawng, ruihhlo, lungalhthei, lung leh ruihhlo tawlhrukna te pawh a tel a ni, a ti.

Official-te'n ramri venhimna khauh takin an kalpui thu sawi nawn fo mah se, dan loa hmalakna chu a pung zel a ni tih a sawi.