Meghalaya : Shillong Airport-ah A-320 thlawhhtheihna ṭum thei dawn

Meghalaya transport minister, deputy chief minister incharge Sniawbhalang Dhar chuan hun rei tak aṭanga an lo nghah tawh, Shillong Airport tih zauh hna thawh ṭan thuai a nih tur thu Thawhṭanni khan a puang. Ruahman anga a kal chuan kum 2026-ah thlawhtheihna lian zawk an thlawh ṭan kan beisei, tiin a sawi.

Dhar chuan Airports Authority of India (AAI) chuan Shillong Airport tihzauhna tur tender an chhuah tawh a tih a sawi bawk. “Tender kalpui mek a ni a, hna kan thawk tan thuai dawn a ni,” a ti. Ram lak hna zawh fel a nih tawh thu a sawi a, compensation pek tur pawh tihchhuah thuai a nih tur thu a sawi bawk. "Engkim tihfel tawh a nih tawh avangin AAI chuan tender chu a kalpui thei a ni,” a ti bawk. AAI hian April 5 khan official-in tender notice a ti chhuak tawh.

Airports Authority of India chuan airport runway hi meter 571-in a ti zau dawn a, hei hian a sei zawng chu metre 2,400-ah a ti pung ang. Hetianga tih changtlunna hian airport-ah A-320 aircraft a ṭum thei dawn a ni. He project hian terminal building leh apron tih zauh bakah infrastructure tih changtlunna pawimawh dangte pawh a huam dawn a, sum senso tur ruahman chu Rs vbc 119.44 niin, thla 18 chhunga thawh zawh hman tura ruahman a ni.

Chief minister Conrad Sangma chuan he hmasawnna hi lawmawm a tih thu sawiin, Shillong Airport tih zauh nana tender tih chhuah chuan kum tam tak chhung an hmalakna a lantir thu a sawi. Thlawhtheihna hmanga inkalpawhna tihc hangtlun chu tourism tih chak nan, investment hip nan leh ṭhalai te tan hun remchang a siamsak a ni, tiin a sawi.