Nagaland : NSF-in Inner Line Regulation Commission din

Naga Students Federation (NSF) chuan Inner Line Permit (ILP) system tih chak tumna kawnga hma lakna atan Inner Line Regulation Commission (ILRC) din a nih thu a puang. December 4, 2024-a NSF Federal Assembly vawi lina neih chuan ILRC dinna tur hian resolution a lo pawm tawh a ni.

NSF president Medovi Rhi chuan ILRC din a nih thu hi sawiin, member panga awmna team hi NSF President hlui (1999–2001), Senchumo NSN Lotha chuan kaihhruaiin kum thum chhung Chairman hna a chelh dawn a ni. Commission hi ILP chungchang ennawn a, chak leh khuah zawka kalpui leh inkaihhruaina tih changtlunna tur a ni.

Hmalakna hmasa ber atan ILRC chuan nimin zing khan Nagaland Chief Secretary hnenah point 10 awmna memorandum an thehlut. Press briefing-ah chairman NSN Lotha chuan Federation-in ILP nena inzawm thila hun rei tak a lo thawh tawh thu a sawi a ni. Sorkar-in ILP dinna atana Bengal Eastern Frontier Regulation (BEFR), 1873 a kalpui dan mumal lo chu a sawisel bawk.

Memorandum-ah hian permit tracking leh regulation atana centralize digital ILP database din, ILP office bik siam leh Dimapur-ah check gate siam, BEFR protocol lama training nei specialize ILP enforcement wing din, financial system langtlang tak siam a, ILP nena inzawm fee leh penalty zawng zawng UPI hmanga digital payment siam an duh thute an tarlang.

Lotha chuan tuna an kalpui dan chu a ṭha lo tih sawiin, police-te chuan ILP system hnuaia exemption leh regulation chungchang chiang taka an hriat loh fo thu a sawi. Hei hian phalna nei lo leh venhim loha state chhunga luh a thlen thu a sawi bawk.