Assam : BJP kaihhruai NDA in campaign ṭan

Assam Panchayat inthlan, May 2 leh 7-a neih tur atan Bharatiya Janata Party (BJP) kaihhruai National Democratic Alliance (NDA) chuan campaign an ṭan ta. Nilaini khan BJP Assam Pradesh chuan state pumah hnehna chan theihna tura an ruahmannate an tlangzarh.

Party thuchhuah tarlan danin, chief minister Himanta Biswa Sarma chuan rally 27-ah thu a sawi dawn a, state BJP president Dilip Saikia chuan campaign meeting 50 chuang a kaihruai ang. NDA hruaitu dangte pawhin poll campaign-ah hian nasa takin an thawhpui beisei an ni.

Zila Parishad seat 397 zingah BJP chuan seat 318-ah candidate an thlang fel tawh a, seat 74 chu NDA hnuaia an thawhpui Asom Gana Parishad (AGP) hnenah pein, a bak chu party tenaute an sem. Party hian nimin khan Zila Parishad candidate hnuhnung ber panga- hmeichhia pali leh mipa pakhat an puang leh a, hmeichhe candidate zawng zawng chu 176-ah a kai chho a ni.

BJP chuan eptu pawl, a bik takin Congress chu an chhungril lama inrem lohna leh thawh ho thiam lo tiin an sawisel a, NDA-in inthlanna kalphung mumal leh nghet tak a kalpui avangin inthlan lo awm tur atan pawh a inringtawk hle tih an sawi.