Meghalaya : High court judge pension-te pual scheme pawm

Meghalaya cabinet chuan Thawhlehni khan scheme thar, chief justice pension tawhte leh state high court judge hluite electric bill, mobile recharge, leh petrol senso tum sakna tur a pawm tih chief minister Conrad K Sangma chuan a puang.

He scheme hnuaiah hian high court judge pension tawhte chuan thla khatah electricity allowance unit 1,000, mobile allowance thla khatah RS 4,200, leh petrol senso thla khatah litre 100 thleng an dawng dawn niin news agency PTI report chuan a tarlang. He hmalakna hi Retired Judges Secretarial Assistant and Domestic Help Rules of 2013 hnuaiah siam a ni.

Cabinet chuan witness-te humhimna tur dan thar a pawm bawk a, hei hi state chhunga criminal law siam tharah telin BNS, BNSS, leh BSA te pawh a huam a ni. Chief Minister chuan Meghalaya Witness Protection Scheme, 2025 hnuaiah thuhretu venhimna tur ruahmanna felfai tak siam a nih thu hi a sawi.

Hei bakah hian cabinet chuan Meghalaya State Language Act of 2005 siamṭhat a remti a, he danah hian Khasi leh Garo chu district-level exam associate official language atana pawm a ni.

Cabinet chuan Meghalaya Farmers Empowerment Commission chairman atana Chief Secretary pension tawh PS Thangkhiew ruat a remti bawk.Chief Minister chuan Lok ayukta thar thlang turin search committee din a nih thu sawiin, bureaucrat hlui PS Dkhar-a'n committee hi a kaihruai a ni.