Meghalaya : NEIGRIHMS team te'n award dawng

New Delhi-a All India Ophthalmological Society kum 83-na denchhena 40th Asia-Pacific Academy of Ophthalmology Congress, April 3-6 chhunga neihah Prof (Dr) Tanie Natung kaihhruai NEIGRIHMS, Shillong research team chuan ‘Best of Indian Journal of Ophthalmology Award’ an dawng.

He chawimawina hi an research paper “Comparison of Hill-RBF 3.0 with Barrett Universal II, SRK/T, Hoffer Q, Haigis, and Holladay 1, post-cataract surgery refractive outcomes in Indian eyes" vanga dawng an ni. Cataract surgery neih aia intraocular lens dah dan hrang hrangte zirchiangin, inzai zawh hnua mit hrang hrang tana ṭha leh, harsatna thlen tlem thei dan ber tur formula te an zirchiang a ni. An zirchianna neih hi khawvel puma cataract surgery hlawhtling taka neihna kawngah mit lam doctor, ophthalmologist tan kaihhruaina ṭangkai tak a nih rin a ni

NEIGRIHMS team hi Dr Natung chuan hoin team member-ah hian Dr Ishita Pandey, Dr Benjamin Nongrum leh Dr Ester Sekhose te an tel. Dr Natung hi Arunachal Pradesh-a East Kameng district-a Lumdung khaw mi niin, mit lam zirchianna leh damdawi lam zirna kawngah a thawh hlawk hle.

Conference-ah hian khawvel pum huapin palai 13,500 vel an tel a, mit lam enkawlna lama inkhawmpui lian ber pawl a ni. Member 27,000 vel awmna AIOS hi India rama medical specialty association lian ber a ni.