Kum 2016 aṭangin state in hmasawnna nasa tak a nei: AP CM Khandu

Arunachal chief minister Pema Khandu chuan state-in kum 2016 aṭangin hmasawnna ropui tak; sorkar policy, siamṭhatna hnathawh, leh in thlakdanglamna a neih thu a sawi.

Chief Minister hian Pathianni khan West Kameng district-a Shergaon-a developmental meeting-ah thu sawiin, kum 2016-a CM a nih hnua GSDP, state budget, per capita income, GST collection, leh state enkawl resource lama hmasawnna nasa tak a awm thu a sawi. State budget chu kum 2016-a Rs vbc 12,500 aṭangin kum 2025-ah Rs vbc 40,000 chuang a nih tawh thu a sawi bawk.

Kum 2016 leh 2025 khaikhin chuan mi pakhat sum lakluh chu 105%-in a pung a, GST lakkhawm pawh 584%-in a pun bakah, kum 2016-a state enkawl resource Rs vbc 900 chu kuminah Rs vbc 40,000 chuang a tling tawh a ni, tiin Thawhṭanni khan a tarlang.

CM Khandu chuan kum 8-9 kalta chhunga hma an sawn avangin stakeholder zawng zawng, cabinet, MLA, panchayat member, chief secretary, leh district official-te chungah lawmthu a sawi. Prime Minister atana Narendra Modi an nei chu an vanneih thu sawiin, India hmasawnna chu hmarchhak hmasawnna nen a inzawm tlat niin a ngai a ni, a ti.

Kawngpui inkal­pawhna chu hmasawnna thlentu pawimawh tak a nih thu sawiin, Khandu chuan kum 2016 aṭang khan thingtlang lam kalpawhna chu 251% a zauh niin, National Highway chu 143% in a pung tih a sawi.