Meghalaya: NEIGRIHMS tan National Institute status dil

Meghalaya sorkar chuan North Eastern Indira Gandhi Regional Institute of Health and Medical Sciences (NEIGRIHMS) chu National Institute atana ruat a nih theih nan hma a la mek a, hei hian infrastructure hmasawnna kawngah pawh a pui thei dawn a ni.

Health minister Ampareen Lyngdoh chuan an hmalakna hi Nilaini khan a puang a, chief minister Conrad Sangma leh sorkar laipui aiawh pawh a biak thu a sawi. NEIGRIHMS chu an thuneihna chhungah awm vek lo mah se India sorkar aṭanga hlawhtlinna an hmuh ngei a beisei thu Lyngdoh chuan a sawi. National Institute status neih hian NEIGRIHMS chu a tihchak mai bakah facility tih zauh, sum tam zawk leh medical service tihchangtlun theihna a siam tur thu sawiin, oncology department changtlung zawk kalpui a, enkawlna thar ber ber siam bakah, Meghalaya mipuite tana damdawi hmanraw tihchangtlun a ni thei dawn a ni, a ti.

Lyngdoh chuan National Institute dinhmun chuan NEIGRIHMS chu sum leh pai leh technical lamah hmanraw tam zawk a neih tir theih phah dawn a; healthcare technology ṭha zawk a hman theih dawn bakah, hmarchhak bial pumpui tan hamṭhatna a thlen tur thu a sawi bawk. Sorkar laipuiin thuchhuah mumal tak la siam lo mah se Meghalaya sorkar chuan chhanna ṭha tak pek a beisei thu a sawi.