Assam : Sorkarin coaching institute-te inrelbawlna tur bill pu lut

Assam sorkar chuan Zirtawpni khan Assembly-a private coaching institute-te inrelbawlna tur Bill a pu lut.

He bill-ah hian zirna in zawng zawngte hi registration ti vek tur tur leh, kaihhruaina siamte chu khauh taka zawm tura tih an ni.

Education minister Ranoj Pegu-a'n Assam Coaching Institute (Control and Regulation) Bill, 2025 a put luhah hian competitive exam-a inbuatsaih zirlai te tana academic support ṭha zawk an neih theihna turin private coaching centre-a inrelbawlna siam a tum a ni. Bill-ah hian coaching institute zawng zawng tan registration tih ngei ngei tur a ni. Bill hian coaching institute-te chu sakhaw bil nena inzawm thil eng pawh tih a khap a, Constitution-a secular principle tarlante zawm turin a ti bawk.

Registration diltu institution-te chuan an curriculum, class hun chhung, co-curricular activity, zirtirtu zirna lama thiamna, tuition fee, physical infrastructure, leh facility dangte chungchang chipchiar takin an pe tur a ni a, registration certificate hi kum hnih chhung hman theih a ni ang a, hemi hnu hian institute-te chuan a thar in dilna an thehlut tur a ni.

Dilna ngaihtuah tura mawhphurtu, thuneitu chuan a thehluh aṭanga thla thum chhungin a pawm emaw hnawl emaw a ngai a ni. Registration kalphung mumal zawka kalpui a nih theih nan sorkar chuan online portal a siam dawn a, dan siam bawhchhiatna a awm chuan sorkarin coaching institute registration cancel emaw suspend theihna thuneihna a nei ang.