Meghalaya: TB dona kawngah technology thar ber hmang

Meghalaya chuan Tuberculosis (TB) screening leh diagnosis lama a kalphung chu ti danglamin, technology thar ber hmangin state chhungah a hma aia rang zawka natna hmuhchhuah theihna tur khawl a hmang ta.

Healthcare changtlung zawk a awm theih nan state chuan kalphung thar a siam a, TB screening atana portable Artificial Intelligence enabled X-ray machine te chu mi harsa zawkte hnenah hman a ni dawn a, ni 100 chhung awh tur Intensified TB-Mukt Bharat Abhiyaan hnuaiah screening hmalakna tihchak a ni bawk ang.

Meghalaya hian he natna hi rang zawka hriatchhuah leh enkawl theihna tur technology thar ber hmangin, Nucleic Acid Amplification Test (NAAT) Machine leh portable X-ray te pawh an hmang tel dawn a ni. NAAT khawl hi kum 2021-a 29 aṭangin kum 2024-ah 80-ah kan tisang a, hei bakah hian district pasarih huam chhungah mobile X-ray unit 15 dah thar a nih thu B. Shanpra, district TB officer, East Khasi Hills, Shillong chuan a sawi.

Amica Joan Rynjah, assistant program officer, National TB Elimination Programme, Meghalaya chuan ni 100 chhung awh tur TB Elimination Campaign chu he natna tamna district pangaah kalpui a nih thu a sawi. He programme hian kum 2024 chhung khan Meghalaya-ah TB vei mi 4,573 a hmuchhuak a, December 7 khan mi 867-te chu TB an vei tih hmuhchhuah a ni. Kum li kal ta chhung khan TB vanga thi zat hi 5% atangin 6% velah pung chhoin, tunah chuan a tlahniam leh ṭan tawh a ni.

State sorkar chuan TB vei leh a enkawltu pakhat tan a thlawna lirtheia tlan theihna a siamsak bawk. Damlo leh an chhungte tan hriselna tih chak leh rang zawka an dam theih nan thla khatah nutritional support Rs 2,000 pek niin, dam tawhte tan pawh skill development an pe bawk niin, Ramkumar S, secretary leh MD, National Health Mission, Shillong chuan a sawi.