Tripura: CPI(M) hruaitute beih an ni

Communist Party of India (Marxist) (CPI-M) chuan West Tripura district, Jaipur area-a an hruaitute tharum thawha beihna an tawk chu na taka an dem thu an sawi a, BJP worker-te chu buaina chawkchhuaktuah an puh. He pawikhawihna hi Inrinni chawhnua Rajnagar Joypur West Para-a local meeting neihnaah a thleng nia sawi a ni. CPI(M) state secretariat chuan pawikhawihtute chu man nghal a, dan anga na taka hrem a phut.

CPI(M) state secretariat thuchhuah danin, he thil hi tlai dar 3:15 vel khan party member-te'n kawngpui, tui in tur, leh service pawimawh dangte chungchanga tualchhung thil phutte ngaihtuah turin street corner meeting an buatsaih a, he hun buatsaih a nih hma hian police department aṭangin a ṭul angin clearance an la tawh a ni.

Eptu pawl party chuan BJP worker 13 aṭanga 14 vel awmna, BJP Mandal president Amitabh Bhattacharjee kaihhruaiin meeting neih lai hian buaina an tih chhuah thu an sawi.

CPI(M) hruaitu leh thlawptu eng emaw zatin hliam an tuar. Party chuan police-te hriattir mah se, thuneitute'n venhimna atan ruahmanna mumal tak an nei lo tih sawiin, CPI(M) hruaitute chuan thuneitute chu hma la lo leh ngaihsak loah an puh a ni.

FIR thehluh ni mah se tun thlengin man an la nei loa, CPI(M) state secretariat chuan he thil thleng hi na takin a dem thu sawiin, mawhphurtute chu rang taka man an phut a ni. Police te chu duhsak bik nei loa mipui vantlang himna atan hma la ṭhin turin an ngen bawk.