Assam: Assam Education Board-in HS first year exam la awm cancel

Assam State School Education Board (ASSEB) chuan Higher Secondary (HS) First Year Examination 2025 atana exam la awm zawng zawng cancel vek turin thutlukna a siam. He thutlukna hi March 21-a Mathematics exam question paper leak nia rinhlelh thu report a nih hnua siam niin, March 24 aṭanga 29 thleng exam neih tur pawh ṭhulh a ni.

March 20 khan institution engemaw zatah Mathematics question paper awmna sealed packet hawn a nih thu sawi a ni a, exam hi March 21-a session hnihna neih tura ruahman a ni. ASSEB chuan thil awmdan a enfiah hnuah, he thil thleng hian exam la awmte pawh a nghawng thei dawn niin an hlauhthawn thu an sawi.

He thil thleng avang hian ASSEB chuan Assam district 10-a private institution 15-te affiliation chu a ti tawp a, hengte hi exam protocol bawhchhia nia hriat an ni. Heng school-te hian zawhna lehkha dahna packet seal-te chu an hawng nia sawi a ni. Education Minister Ranoj Pegu chuan social media-ah, March 24 aṭanga March 29 thlenga HS First Year exam la awmte chu dan bawhchhiatna avangin tihtawp a nih thu a sawi ta a ni.

ASSEB pawhin thuchhuah siamin, Controller of Examinations (In-Charge), Ranjan Kumar Das chuan institution engemaw zatin March 20 khan question paper packet-te seal an ti chhia tih a tarlang a, exam hi a tuk zingah neih tura ruahman ni mah se exam lo awm tur atana question paper zawng zawng chu institution-te enkawlna hnuaia awm vek a nih avangin hetiang leak hi a awm thei leh thei a ni, a ti.

Police-te chuan chipchiar taka chhuichianna an nei dawn a, mawhphurtu hriatchhuah an tum mek a ni. Minister Pegu chuan institution dik lote chungah hremna pek a nih tur thu leh academic year 2025-26 atan 11th-grade zirlai admit phalsak an nih loh tur thu a tarlang.