Meghalaya: Mihring hmanga sumdawnnaa inhnamhnawih mi pathum man

Thawhlehni tlai khan Ri-Bhoi district-ah Bangladesh aṭanga India rama mihring hmanga sumdawnnaa inhnamhnawih, organized human trafficking network member-te an man.

Ri-Bhoi Police Superintendent, Vivekanand Singh Rathore chuan Bangladesh mite chu Dawki ramri aṭanga Guwahati pana lirtheia kal an ni tih an hriatruk aṭanga man an nih thu a sawi.

Byrnihat Outpost bulah checkpoint siam a ni a, thuneitute chuan lirthei (AS-01-FJ-4645) chu lo dangin, a chhunga chuang mi pahnih, Khulna, Bangladesh mi, Jannati Sheikh (26) India Aadhaar card lem keng leh Assam mi driver, Raushan Khan te chu man an ni.

Thuzawhfiah tura an lak hnuah an pahnih hian Bangladesh leh India inkarah dan loa mihring phura ramri kanpui ṭhin sumdawnnaa inhnamhnawih, organized network-a tel an ni tih an inpuang a, document felfai an nei lo bawk a ni.

Foreigners Act, 1946 Section 14C hnuaiah thubuai ziahluh a ni tawh a, chhui chian mek a ni. Thubuai siamsakte hi custody-ah hren an la ni a, thuneitute chuan an inzawmna chhui chhuah tumin hma an la mek a ni. Thu zawhfiah belh a nih hnuah rinhlelh dang, Pynursla khuaa mi Balajied Khongsun (27) chu Nilaini khan an man bawk.