Assam : Congress in CM sawisel

Congress party chuan Inrinni khan Assam chief minister Himanta Biswa Sarma chu, state Congress thupuangtu Reetam Singh-a'n social media-a a thu post avanga man a nih chungchangah an sawisel. Congress communication chief Jairam Ramesh chuan social media platform X-a post a siam vanga Singh-a man a ni chu pawi a tih thu a sawi. Congress party chuan Singh-a thu post chu thil awmze ṭha tak nei a nih thu an sawi.

An thawhpui Reetam Singh-a social media-a thudik post avanga man a ni hi thil rapthlak leh thil pawi tak a nih thu Ramesh chuan a sawi.

Singh hi Inrinni khan a thu post vang hian Guwahati-a a chenna in aṭangin Lakhimpur district police team-in Guwahati Police-te puihnain an man a ni. A social media post-ah hian BJP hruaitu senior pathum, state chief hlui pakhat leh MLA ni lai pahnih te laka thubuai ziahluh dinhmun a zawtfiah.

Congress hruaitu senior leh MP Gaurav Gogoi chuan Singh-a man a ni chu na takin a dem tih a sawi. Lok Sabha-a Deputy Leader of Opposition ni mek Gogoi hian Assam chief minister Himanta Biswa Sarma chu a bei a, police-te chu politics hmanrua atana hman an nih thu a sawi.

Gogoi chuan Assam police-te rinawmna tlahniam chungchangah pawh a lungawi loh thu a sawi bawk a, hei hi CM Sarma-a’n dan kengkawhtute chu politics thila mi man tura a nawr vang a nih thu a sawi bawk.