Assam: Finance Minister-in budget pharh

Assam finance minister Ajanta Neog chuan nimin, Thawhṭanni khan Assembly-ah 2025-26 kum atana state budget Rs vbc nuai 2.63 a pharh a, budget thara sum indaih lohna tur hi Rs vbc 620.27 a ni.

Budget-ah hian state chhunga hnathawk, thla khata Rs 15,000 chin hlawhte tana professional tax tih tawp rawt a ni a, hei hi hnathawk nuai 1.43 velin an chhawr thei dawn a ni. Sorkar hnuaia contract-a thawk, commercial bank kaltlanga hlawh pekte chu zero-cost accident and death insurance scheme in a huam tel vek tawh dawn a ni.

Finance Minister Neog hian budget a pharh vawi khatna niin tea industry-in harsatna a tawhte tih ziaawmna turin green tea hnah-a chhiah ngaihnathiamna hun chu kum hnih dang atan pawhsei a nih thu a puang. Tea worker-te puihna atan vawi khat Rs 5,000 pek an ni dawn a, hei hi tea worker nuai 6.8 velin an dawng thei dawn a, hemi atan hian sorkar chuan Rs vbc 342 a ruahman.

Budget-ah hian Finance Department tan economic resilience leh financial reform kalpui nan Rs vbc 35,301 ruahman a ni. Hma lakna tura ruhman zingah hian Direct Benefit Transfer (DBT) infrastructure tih chak, e-collection leh e-payment system tihpun, credit-deposit ratio (CD ratio) tihsan a, national average 78% thlenga tihsan te a tel.

School Education Department tan Rs vbc 18,733 ruahman a ni a, hei hian sorkarin zirna infrastructure tih changtlun leh mi zawng zawng huapzo zirna tihhmasawn a ngaih pawimawhzia a ti lang niin Minister chuan a sawi. Budget aṭanga a tam zawk chu PM POSHAN Scheme tihzauh nan hman a ni ang a, naupang nuai 31.75 chuangin an chhawr thei dawn a, an ei leh in mamawh phuhruk a nih theih nan hman a ni ang.

Home & Political Department tan dan leh thupek tih chak a, police infrastructure tih changtlun nan leh, pawikhawihna dona atan Rs vbc 8,291 ruahman a ni. Budget-ah hian police station thar 100 sak a nih tur thu tarlan a ni a, state pumah police station 162 sak belh mek a ni bawk. Dhemaji, Dhubri, Karimganj, leh Tinsukia-a Model Police Reserve pali chu tihchangtlun a ni bawk ang.

Public Works Department (PWD) tan Rs vbc 10,200 ruahmanin kawngpui inzawmna, khawpui kawng, leh high-speed expressway tih hmasawn tum a ni.

Mukhyamantir Pakipath Nirman Achani hnuaiah sorkarin kawngpui km 1,361 a siam zo tawh a, thingtlang kawngpui km 4,846 dang siam phalsak a ni bawk. Hei bakah hian Mukhyamantir Path Nobikaran Achani hnuaiah thingtlang leh khawpui kawng km 3,555 chuang siamṭhat a ni ang.

Health & Family Welfare Department tan Rs vbc 5,393 ruahman niin, thingtlang lam hriselna leh nu hriselna tih changtlunna lam ngaih pawimawh a ni.

Sorkar chuan tea garden 20 huam chhungah “Healthy Garden Population - Comprehensive Health Screening” pilot project a kalpui a, hemi hnuaiah hian comprehensive health screening leh primary healthcare pek a ni ang.

Women and Child Development Department tan Rs vbc 4,449 ruahman a ni a, naupang ei leh in, hmeichhiate himna, leh puihnate ngaih pawimawh a ni. Sorkar chuan Anganwadi Centre 62,000 chuang siam tawhin, naupang leh nu nuai 30.68 ten hamṭhatna an dawng mek a ni.

State flagship scheme, Orunodoi scheme tan hmeichhee nuai 37 chuang puihna turin Rs vbc 5,000 ruahman a ni a, hmeichhe naupangte zirna sang zawk an zir chhunzawm leh child marriage tih bona tura hmalakna, Mukhiya Mantir Nijut Moina scheme tan Rs vbc 391 ruahman a ni.

Assam sorkar chuan Dibrugarh-ah Assembly building thar leh MLA hostel a sa dawn bawk a, hemi senso atan hian Rs vbc 200 a dah.