Meghalaya : NEIGRIHMS-in virtual autopsy training nei

NEIGRIHMS, Shillong-a Department of Forensic Medicine chuan Virtual Autopsy chungchangah kar li chhung awh hands-on training program chu hlawhtling takin a zo a, forensic science lama hmasawnna lian tak a ni.

February 10 aṭanga March 8 thlenga training hi neih a ni a, India ram hmun hrang hrang aṭangin faculty leh resident-te an tel. He programme hi Department of Health Research thlawpna hnuaiah neih a ni.

CT scan technique hmanga siam, Virtual Autopsy hi post-mortem exam neih dan ṭhin aiin ruang pawh ti chhe nasa lo zawka tih theihna tur a ni. Advanced imaging technology hmangin forensic expert-te chuan mi thi chu zai ngai loin an zirchiang thei a, chu chuan thih chhan leh a thih dan report chiang zawk a siam thei a ni.

NEIGRIHMS hi India rama he forensic hmanraw changkang tak hmangtu pahnihna a ni ta tih Forensic Medicine Department Head Prof AJ Patowary chuan a sawi. Ram chhunga forensic investigation tih changtlunna kawngah he hmasawnna pawimawhzia hi a sawi bawk.

Training programme kharna inkhawmah hian NEIGRIHMS Director Prof (Dr) Nalin Mehta chuan zirchianna nei tura kalkhawmte chu a fak a, an institution-ah ṭheuh hetiang centre hi siam tura hma la turin a ngen.

NEIGRIHMS-a Department of Forensic Medicine chuan nakin lawkah hetiang training programme tam zawk neih a tum thu a puang a, hei hian forensic specialist-te chu Virtual Autopsy lama thiamna nei tura thuamin, India rama forensic science hmasawnna kawngah a pui thei dawn a ni.