Meghalaya: Assam nen inremna siam turin hma la

Meghalaya sorkar chuan a ṭhenawm state, Assam nena ramria inremna ngelnghet tak siam chu dah pawimawh berin, an inkar boruak ṭha lote chinfel dan a zawng dawn tih chief minister Conrad K. Sangma chuan a sawi.

Hmarchhak state pahnihte hian an ramria buaina an neih hmun 12 zinga hmun parukah inremna an siam tawh a ni. A bak hmun paruk dangah pawh inremna siam leh dan kawng hi an ngaihtuah mek bawk. Hemi atan hian regional coordination committee-te pawhin inbiakna an nei mek a ni. Inremna siam tuma hma an lak mekna zingah hian West Khasi Hills-a Langpih leh Assam Karbi Anglong Block I & II te pawh an tel.

Thawhlehnia Assembly inkhawma thu a sawiah, CM Sangma chuan ramria remna a awm theihna atan an thawh mek thu leh, Memorandum of Understanding (MoU) an ziah thu a sawi. Hmalakna ṭhenkhat awm tawhin, hmalak chhunzawm zel a nih tur thu a sawi a, sorkar chuan inrem lohna chinfelna hmunah infrastructure ṭha tak a awm theih nan theihtawp a chhuah dawn a ni, a ti.

Assam leh Meghalaya hian hun rei tak chhung ramri, km 884.9-a thui hmun 12-ah buaina an nei a ni. State pahnihte hian kum 2022 March khan New Delhi-ah union home minister Amit Shah hriatpuinain hmun parukah buaina tih tawp a nih theih nan inremna an ziak a ni. A bak buaina la awm danga inremna siam tura inbiakna kalpui chuan a ṭha zawngin hma a sawn zel tih CM chuan a sawi.