Assam: 2026 assembly inthlan atan Congress inbuatsaih ṭan

All India Congress Committee (AICC) chuan kum 2026 Assam Assembly inthlan neih tur atan inbuatsaih ṭanin, Bharatiya Janata Party (BJP) paihthlak theih dan tur kawng (strategic roadmap) an ngaihtuah.

Congress president Mallikarjun Kharge leh Lok Sabha opposition leader Rahul Gandhi-te chuan Ningani khan Delhi-a party headquarters-ah Assam Congress hruaitute chu meeting neihpuiin, assembly inthlan lo awm tura atana hma lak dan turte an sawipui a ni. Meeting hi darkar thum dawn neih a ni.

Assam-a BJP sorkar paihthla tura party mi leh sa inlungrual leh thawh hona ṭha neih a ṭul thu Congress president chuan a sawi, hma lak chhoh dan turte a kawhhmuh bawk. Meeting-a tel Lok Sabha MP Gaurav Gogoi chuan, " Assam-ah democracy vawnnun zel kan duh chuan BJP sorkar hi paihthlak a ngai a ni. Mi zawng zawngin khawtlanga boruak ṭha lo a awm zia pawh an hre vek a ni," a ti.

Assam Congress president Bhupen Borah pawhin Himanta Biswa Sarma chu chief minister eiru nasa ber a ni tiin, a eiruk dan finfiahna te pawh hruaitute hnenah an hriattir tawh a, hengte hi inthlan campaign neih hunah mipui hmuhah an lo puangzar dawn tih a sawi.

Congress hruaitute chuan a bul ṭhut aṭanga chak taka kal theihna turin, state chhunga bial hrang hrangah pawh a bial mil zela an mamawh leh ngaih pawimawhte hriatsak a ṭul tih an sawi. Scheduled Castes (SC), Scheduled Tribes (ST) leh tea tribe pualin team hrang hrang din an tum.