Sikkim: High-level review meeting neih a ni

Sikkim chief secretary R. Telang (IAS) kaihhruaiin nimin khan Sevoke-Rangpo Railway Project (SRRP) hmalakna kal zel dan thlirletin, Tashiling Secretariat-ah high-level review meeting neih a ni.

Meeting-ah hian state sorkar department hrang hrang aṭangin senior official-te bakah, North East Frontier Railway (NFR) aiawh te an tel

Sawihonaah hian infrastructure tih hmasawn, project hun bituk, leh rel kawng project kalpui dan tur kawnga harsatna awmte an sawi. Official-te chuan Sevoke aṭanga Rangpo thleng, km 45-a thui all-weather railway line siam hna chu 70% chuang an zawh tawh thu leh, December 2027-a zawhfel theih a nih tur thu an sawi. Passenger leh bungraw phur rel awm theihna tura duan rel kawng hian he biala inkalpawhna nasa takin a tichak dawn a ni, an ti. Sevoke station yard hi sak zawh a ni tawh a, Rangpo-ah hian world-class rel station siam tum a ni bawk.

Project thawh hnihnaah hian Rangpo-Gangtok rel kawng chu zauh tum a ni a, Gangtok- Nathula rel kawng zauh hna chu a thawh thumnaa thawh tura tih a ni.

Chief Secretary Telang chuan SRRP chu a hun taka kalpui a pawimawh thu sawiin inkalpawhna ṭha, economy ṭhanlenna, state chhunga tourism industry tih changtlun kawnga a puih tur thu a sawi. Stakeholder zawng zawngte chu inremna vawng reng tur leh project hun tiam ti hlawhtling tura hna la awmte chak taka thawk turin a chah.