Advantage Assam 2.0 summit-ah Rs vbc nuai 4.91 investment ti

Advantage Assam 2.0 Investment and Infrastructure Summit chu Nilaini khan zawhfel a ni a, summit chhunga Assam tana investment tih chu Rs. vbch nuai 4.91 a tling a ni, tiin Assam chief minister Himanta Biswa Sarma chuan a sawi.

Ni hnih awh summit neih chhung hian industry, power, mine, information technology, environment, zirna, health, tourism, agriculture, leh sector hrang hrangah thawhhona tur Rs vbc 2 chuanga inremna siam a ni.

CM Sarma chuan he thil thleng hi thil ropui tak niin a sawi a, Assam hmasawnna atana pawimawh tak a ni, a ti. Advantage Assam 2.0 hian hmalam hun atana Assam hmasawnna tur kawng a kawhhmuh a ni, tiin a sawi.

Summit-ah hian sumdawng lian Mukesh Ambani leh Gautam Adani te chuan Rs vbc 50,000 hu ve ve investment an tih tur thu an puang. Hei bakah hian Assam sorkar chuan 200MW data centre siamna turi Virinchi Limited chu Rs vbc 3,000 hu Memorandum of Understanding (MoU) a ziahpui a, Virinchi Healthcare Private Limited chu khum 500 awmna tur super-speciality hospital dinna atan Rs vbc 200 hu inremna a siampui bawk.

Cement siamna lamah pawh hlawkna an hmu a, Star Cements Ltd chuan a hnuaia mi, Star Cement North East Ltd. kaltlanga cement clinker leh grinding plant siamna tur Rs vbc 3,200 inremna a ziahpui. State sorkar chuan Matheson Hydrogen Pvt Ltd chu 95 KTPA Hydrogen and Steam Generation Plant siamna turin Rs vbc 1,400 hu MoU a ziahpui bawk a ni.

UltraTech Cement chuan grinding unit leh cement-bulk terminal siamna atan Rs vbc 700 a ruahman a, Copper Plus Holdings SAC pawhin mining exploration leh service atan Rs vbc 1,000 dah a remti bawk.

Tamara Leisure Experiences Private Limited chuan Assam tourism lam tih larna atana pawimawh, Kaziranga-a five-star eco-resort siamna atan Rs vbc 275 a ruahman. Heng bakah hian company eng emaw zatin Assam tan sum ṭhahnem tak an invest a ni.

Summit-ah hian international non-financial MoU pali ziah a ni bawk a, heng zingah hian hriselna leh agriculture lama tih hmasawnna tura Bill & Melinda Gates Foundation thawhpuina tur pawh a tel.