Sikkim : CM in 'Janta Bhet Karyakram' tawp khar

Sikkim chief minister Prem Singh Tamang chuan ni thum chhung awh, mipui hmasawnna tura hmalakna, 'Janta Bhet Karyakram' chu nimin khan Gaushala, Amba-ah a khar.

Rorelna leh khawtlang tih chakna tura programme ruahman hi Rhenock Constituency huam chhunga mipuiten an hlawkpui hle.

He hmalakna hi February 23 khan Padamchey Secondary School-ah neih ṭan a ni a, CM Tamang chuan bial chhung hmun hrang hrang aṭangin mi 1,100 vel a kawm a ni. Ni hnihna chu Rhenock-a Forest Bungalow-ah neih leh a ni a, Budang Kamarey GPU, East Pendam GPU, leh Chalamthang Pacheykhani GPU hnuaia East Dikling, Loosing, leh Bengthang ward hrang hrang aṭangin an tel. CM Tamang chuan mipui harsatna te ṭha taka chinfel a, service ṭha tak pek an nih theih nana sorkar inpekna te a sawilang a ni.

Janta Bhet Karyakram hian infrastructure hmasawnna, tui supply, healthcare, zirna leh hnathawhna tur kawng hrang hrang a huam. He hunah hian sorkar hotute leh department aiawh an tel a, welfare scheme te leh hmasawnna project hrang hrang chipchiar taka hriattirna pein, mipuiten sorkar aṭanga hamṭhatna an dawn theihna tura kaihhruaina dik tak an neih theih nan hmalak a ni.

CM Tamang chuan he hmalakna hi langtlang leh mi zawng zawng huapzo tura kalpui a nih tur thu a sawi a, programme neih chhunga mipui ngaihdan lakkhawmte chu nakin lawka policy thutlukna siamna atan ngaihtuah tel a nih tur thu a tiam bawk.

Outreach drive hi Rhenock Constituency hmun hrang hrangah chhunzawm a ni dawn a, hei hian mipui tam zawkin CM nena inpawh tawnna leh an harsatnate sutkian theihna hun a siamsak dawn a ni. He huna tel tam tak chuan sorkar nen inzawmna an neih theih avangin lawmthu an sawi a, khawtlang nunah hmasawnna a awm theih an beisei thute an sawi bawk a ni.